Зотаў Іван Ізотавіч
1930
Кандыдат эканамічных навук.
Нарадзіўся ў в. Брылёўка Краснапольскага раёна.
У 1949 г. скончыў Палужскую сярэднюю школу.
У 1955 г. – юрыдычны факультэт Маскоўскага дзяржаўнага універсітэта.
У 1956 г. – Маскоўскі дзяржаўны эканамічны інстытут.
У 1963 г. – аспірантуру Маскоўскага навукова-даследчага інстытута працы.
У 1969 г. у в. Брылёўка ім закладзены батанічны сад экзатычных дрэў: сібірская лістоўніца, ядловец канадскі, туя, дуб чырвоны, елка японская, каўказская пальма, лістоўніца з маскоўскай сядзібы Шарамецьева.
Батанічны сад знаходзіцца на ўліку ў міжнародным экалагічным фондзе, мае сувязі з многімі прыродаахоўнымі арганізацыямі свету, у тым ліку ЗША, Канады, Венгрыі і іншымі.
Батанічны сад носіць назву “Іванаў хутар”.
Цяперашні “Іванаў хутар” – гэта тры гектары аформленага саду. Прычым экзатычныя для нашай мясцовасці дрэвы ўжо настолькі асіміляваліся, што пачынаюць самаўзнаўляцца і насеннем распаўсюджвацца за межы батанічнага сада.
Акрамя дрэваў тут ёсць некалькі малых сажалак і альтанка. У садзе – нібыта дзве часткі. Адна – цёмная, дзе толькі ствалы тырчаць, а кроны наверсе ўбачыць цяжка. Гэта быў пачатак сада, калі ў распараджэнні Івана Ізотавіча было толькі дзесяць сотак, а пасадзіць хацелася шмат. Большая палова “Іванава хутара” – светлая, якая была закладзена пазней і дзе поўнасцю выявілася фантазія аўтара. Блакітныя елкі, залацістая туя, бардовы фундук і зялёныя хвойныя дрэвы ствараюць спалучэнне колераў, якое моцна ўражвае.
Іван Ізотавіч кажа, што яго гордасць – гэта ўсходні бук, ён прывёз з Каўказа і з якім давялося нямала папоркацца. Цяпер такім жа чынам даводзіцца гаспадару расціць кітайскі лімоннік і лаўр высакародны.
