Нятылька Аляксандр Міхайлавіч
10.03.1922 – 08.07.1988
Кандыдат педагагічных навук (1964).
Нарадзіўся у в. Палуж Краснапольскага раёна.
У 1940 г. з адзнакай скончыў 10 класаў Палужскай сярэдняй школы.
Да снежня 1940 г. працаваў настаўнікам Зябеньскай школы Чэрыкаўскага раёна, а потым быў прызваны на службу ў Чырвоную армію.
З першых дзён Вялікай Айчыннай вайны на Ленінградскім фронце. Ваяваў на Пецяргофскім напрамку, ваяваў у складзе 2-й Ударнай арміі. Закончыў курсы па падрыхтоўцы афіцэраў. Яму было прысвоена званне лейтэнанта.
Дэмабілізаваўся ў 1945 г.
Працаваў настаўнікам у в. Зоры Чэрыкаўскага раёна (1946-1947), вучыўся на філалагічным факультэце Беларускага дзяржаўнага універсітэта (1947-1951).
У 1963 г. А.М. Нятылька ў Маскве пры Акадэміі педагагічных навук паспяхова абараняе дысертацыю на атрыманне вучонай ступені кандыдата педагагічных навук. Гэта быў першы сярод нашых землякоў вучоны ў галіне педагогікі.
Вучоны працягваў творча працаваць, яго навуковыя артыкулы друкаваліся ў часопісах “Народная адукацыя”, “Савецкая педагогіка”, “Навука і рэлігія”. Ён стаў сааўтарам педагагічнай энцыклапедыі, самастойна вывучаў англійскую і іспанскую мовы. У перспектыве планаваліся фундаментальныя распрацоўкі па педагогіцы. Аляксандр Міхайлавіч Нятылька рабіў накіды доктарскай дысертацыі.
Знаходзіўся у творчай камандзіроўцы на Кубе, дзе працаваў навуковым кансультантам і чытаў лекцыі ва ўніверсітэце г. Санта-Клара (1966-1968 гг.).
Пасля вяртання на радзіму А. М. Нятылька працаваў на кафедры педагогікі Уладзімірскага дзяржаўнага педагагічнага інстытута імя П. І. Лебедзева-Палянскага. Як вучоны-педагог ён выступаў за выкарыстанне ўсіх разнастайных форм, сродкаў і метадаў у вучэбна-выхаваўчым працэсе. Наш зямляк Аляксандр Міхайлавіч Нятылька ўсё жыццё прысвяціў педагагічнай навуцы, якой ён служыў самааддана і творча.
